AAP-in rampumah inzarpharh tum

Delhi Assembly inthlana hneh taka an chak hnuah, Aam Aadmi Party (AAP) chuan an party chu rampum huapa inzarpharh an tum.

AAP hruaitu Sanjay Singh chuan an party Political Affairs Committee (PAC)-in state dangah huang zauh an rel tih a sawi a, "Delhi inthlanah hneh taka thlan tlin kan ni a, mipuite min duhsakna pawh kan hmu a ni. Hei vang hian national level-a kan party pawh inzarpharh kan tum ta a ni," a ti.

State danga an party tihchakna turin theihtawp an chhuah dawn tih a sawi a, mahse state party-te inthlan an chuh dawn leh dawn loh chu state chhunga an party leh hruaitute dinhmun enfiah hnuin thutlukna an siam chauh ṭhin dawn tih Singh chuan a sawi.

AAP hian party chhunga buaina an neihte chinfel tumin hma a la zel a, an party hotu leh Delhi Chief Minister Arvind Kejriwal chu ni 12 chhung inekawl tura chawlh a lak hnuin Thawhṭanni khan a hna a zawm leh a, Thawhlehni khan party hruaitute hian meeting an nei nghal a ni.

Singh chuan an party chhunga buaina chu a reh thuai dawn tih a sawi a, party kalphung leh Kejriwal-a laka lungawi lo leh tun thla tir lama PAC member aṭanga an ban, Prashant Bhusan leh Yogendra Yadav te pawh hruaitute chuan an kawm dawn tih a sawi.