J&K Assembly inthlan atan party-te inbuatsaih

Jammu and Kashmir assembly inthlan neih tur atan political party hrang hrangte an inbuatsaih chho a, kum 10 hnua assembly inthlan neih leh hmasa bera chak ngei tumin ṭan an la nasa hle.

BJP-in candidate list tur a tih chhuah ennawn leh nghal

Bharatiya Janata Party (BJP) chuan Jammu and Kashmir assembly inthlan neih tur atan an candidate list chu nimin zing khan a ti chhuak. Mahse candidate 44 hming an tarlanna list hi sut leh nghalin, a hnuah candidate 15 hming tarlanna list an ti chhuak ṭha leh a ni.

Nimina candidate list tih chhuah hi inthlan thawh khatna a mi tur a ni. J&K-a assembly seat 90 awmah inthlan hi thawh thuma neih a ni dawn a, a thawh khatnaah hian constituency 24 ah inthlan hi neih a ni ang.

BJP Central Election Committee chu Pathianni zan khan party candidate tur ngaihtuahin an ṭhukhawm a ni. Nimina list tih chhuaha candidate 15 hming an tarlan zingah hian hmeichhe pakhat chauh a tel a ni.

Congress leh NC hruaitute inbe leh

Congress leh National Conference party chu J&K assembly inthlan awm turah thawkdun turin an lo inrem tawh a, mahse seat insem dan turah an la inlungrual thei lo.

Nimin khan Congress party hruaitu - KC Venugopal, Salman Khurshid leh J&K in charge Bharat Solanki te chuan Srinagar-ah National Conference (NC) president Farooq Abdullah leh vice president Omar Abdullah te chu an chenna inah an hmu a, seat insem dan tur chungchang an sawipui.

Party pahnih hruaitute hian Assembly seat insem dan turah seat tam zawkah inremna an siam thu an lo sawi tawh a ni. Mahse tualchhunga party hruaitute an inbiaknaah an seat chan tur chungchangah an inlungrual thei lo a, hei vang hian party hruaitute hian an sawi ho leh a ni. NC provincial president, Nasir Aslam Wani chuan thil inhrilhfiah ngai deuhte a awm a, mahse hei hi party pahnih hruaitute hian an chinfel thuai a ring tih a sawi.