Adani Power-in thermal plant a siam chungchangah NGT-in sorkar laipui leh UP sorkar hriattirna pe

National Green Tribunal (NGT) chuan Uttar Pradesh-a Mirzapur forest division-a forest ram chhungah Adani Power hnuaia Mirzapur Thermal Energy UP Private Limited-in thermal plant a siam chungchangah, sorkar laipui leh Uttar Pradesh sorkar hnenah insawifiah tura hriattirna a pe.

Report-a a lan danin, Mirzapur Thermal Energy UP Private Limited hian phalna nei loin forest ramah hian kawng leh bangte an siam a, hei bakah mi dang ramte pawh an khawih tel bawk. Helai ram hi Mirzapur forest division hnuaia bear conservation reserve atana rawt mek a ni.

Kum 2016, December 21 khan green tribunal hian Mirzapur-a Dadri Khurd khuaah 2x660 MW super critical coal-based thermal power siamna tur power company, Welspun Energy Privated Limited hnena Environmental Clearance (EC) pek chu a lo hnawlsak tawh a ni. Mahse tun hnaiah plant siam hna hi Adani group hnuaia Mirzapur Energy UP Private Limited hnenah pek a ni leh ta a ni. Plant siamna bula ram neitu eng emaw zat chuan company hian an phalna loin an ram an hmansak tiin district magistrate hnenah pawh memorandum an lo thehlut tawh a ni. Court-in thupek a ti chhuak chungin company hian a hna thawh lai chu a chawlhsan duh lo niin an sawi bawk.