Actor Darshan tana VIP treatment pek vangin prison official 7 suspend

Bengaluru prison official pasarih chu jail chhungah Kannada actor Darshan Thoogudeepa VIP anga an lo enkawl avangin supsend an ni a, an chungchang hi chhui chian nghal a ni bawk.

Parappana Agrahara Central Jail a tang mek, Darshan hi jail chhungah zalen taka a awm lai, coffee leh meizial keng chunga hahdam taka chair-a a ṭhu lai leh video call hmanga mi a be lai thlalak leh video a darh a, a bulah hian midang pathum an lang ve bawk. Hengte hi pawikawihna inhnamhnawiha puh Wilson Garden Naga, actor manager Nagaraj leh jail tang dang Kull Seena te nia sawi an ni.

Darshan leh mi dang 16-te chu June 9-a apartment bul tuiluankawra a ruang chhar, Renukaswamy thah a nih kaihhnawiha judicial custody-ah dah mek a ni. An zingah hian Darshan ṭhian ṭha tak Pavithra Gowda pawh a tel. He case hi milar Darshan hming a lan ve vang hian ngaihven a hlawh hle nghe nghe. Police lamin an tarlan danin, kum 33 mi Renukaswamy hi actor Darshan ngaisangtu niin actor ṭhianpa, Gowda hnenah hian message dengkhawng tak, Darshan ti hmingchhe thei a thawn a, hei vang hian he tualthahna hi a thleng ta nia sawi a ni.

Renukaswammy pa, Kashinath S Shivanagowdru chuan jail chhunga Darshan leh a ṭhiante zalen leh nuamsa taka an awm chu mak a ti hle tih sawiin, an chungchang chhui tur hian CBI a duh tih a sawi.