MHA-in Ladakh-ah district thar panga a puang

Ministry of Home Affairs chuan nimin, August 26 khan Ladakh union territory-ah district thar panga siam belh a nih thu a puang. District thar panga te chu Zanskar, Drass, Sham, Nubra leh Changthang te an ni.

Union home minister Amit Shah chuan MHA thutlukna siam hi X kaltlangin a puang a, "PM Narendra Modi-a'n Ladakh-a hmasawnna thlenna tura a hmathlir neihte bawhzuiin, MHA chuan Union Territory-ah hian district thar panga a siam belh a ni," a ti.

Ladakh mipui ten sorkar aṭanga hmasawnna leh changkanna te an kawtkai mai a an hmuh theihna tur atan, heng hmun kilkhawr leh te berte thleng phak thei hi PM Modi kaihhruai sorkar chuan a ngaihpawimawh vang a ni, tiin Home Minister chuan district thar siam belh a nih chhan a sawi zui bawk.

District thar puan belh a nih hma hian UT-ah hian district pahnih, Leh leh Kargil chauh a awm a ni. Sorkar laipuiin Article 370 a tih tawp hnuah, kum 2019 khan state pakhat ni ṭhin chu UT pahnih - Jammu and Kashmir leh Ladakh-ah ṭhen hran niin, Ladakh inrelbawlna leh inkaihhruaina te chu Home Ministry hnuaiah a awm zui a ni.