Kolkata-a nawrh huaihawtte hnawh darh nan Police-in tear gas leh water canon hmang

28th August, 2024

Kolkata-a zirlai pawl ten nimin, August 27-a pawngsual leh tualthahna duh lohna lantira 'Nabanna Abhijan' kawngzawh an neih naah police-te nena innawrin, nawrh huaihawtte hnawhdarh nan police chuan tear gas leh water canon an hmang.

Zirlaite hian state secretariat-ah luh tumin police-te thir hung paltlang an tum a, an innawr buai ta a ni. An innawrnaah hian police lamah hliam tuar eng emaw zat awmin, zirlai pawl lamah pawh police-te kut tuara hliam an awm ve bawk.

Kawngzawh huaihawttute hian RG Kar Medical College-a pawngsual leh inthahna thleng vangin state chief minister Mamata Banerjee chu bang turin an ngiat. State Secretariat-ah hian an thil phut hi thlen an tum a ni. CM kaihhruaina hnuaiah pawikhawihna tenawm tak thlentu venhim tumah an puh a, hemi chungchangah hian CM lak aṭanga chhanna hmuh ngei an duh thu te an sawi.

Nimin khan khaw chhung hmun hrang hrangah nawrh hi huaihawt niin, Howrah Bridge leh Santragachi Railway Station bula Kona Expressway-a police-ten daidanna an siamte chu nawrh huaihawtte hian paltalng an tum avangin venhim hna thawktute nen an intibuai bawk.

BJP-in police-te chet dan duh lohna lantir dawn

BJP chuan Kolkata-a nawrh huaihawtte chunga police-te chet dan chu an dem thu sawiin, an lungawi lohna lantir nan state pumah darkar 12 awh bandh huaihawt an tum thu an sawi.

Bengal BJP president Sukanta Majumdar chuan tukin zing dar 6 aṭanga tlai dar 6 thleng bandh hi huaihawt a ni dawn tih nimin tlai khan a puang a, mipuite chu thlawp turin a ngen bawk. Nawrh huaihawtte chunga police-te chet dan chu a ṭha lo hle a ni tiin, an lakah action la turin thuneitute pawh a phut tih a sawi bawk a ni.

Amit Malivya, BJP IT Cell hotu chuan CM Banerjee chu zirlaite chu a hlauh avangin, Kolkata police-te chu kawngpuiah zirlaite danna tur tam tak siam turin a ti a ni, a ti. Banerjee kaihhruai sorkar chuan pawikhawihtute chu hum a tum a, evidence pawh a ti chhia a, rorelna dik duha auchhuah tumte chu nawr beh a tum a ni, tiin BJP chuan an sawi.