Shivaji Maharaj lim chim avangin lim siamtu lakah FIR thehlut

Maharasthra-a Sindhudurg district police-te chuan Thawhṭannia Chhatrapati Shivaji Maharaj lim chim chungchangah, he lim siam hna thawktu constractor leh consultant-te lakah nimin khan FIR an theh lut.

Kum zabi 17-na hunlaia Maratha pasalṭha, Shivaji Maharaj lim hi feet 35-a sanga siam niin, prime minister Narendra Modi chuan December 4, 2023 khan he lim hi ropui takin a hawng a ni.

Lim chim vang hian eptu lam chuan Maharashtra chief minister Eknath Shinde kaihhruai sorkar chu na takin an bei zui bawk. CM Shinde chuan he lim hi Indian Navy design leh siam a ni tih a sawi.

Public Works Department (PWD)-a assistant engineer chuan lim chim vang hian Malvan police station-ah complaint hi a thehlut a, lim chim chungchangah hian a siamtu artist leh consultant chu mawhphurtu an ni, a ti. A complaint thehluh behchhan hian contractor Jaydeep Apte leh structural consultant Chetan Phil lakah FIR ziah luh a ni tih official chuan a sawi. Midangte himna tiderthawng, tualthah tum leh inbumna kalpuia puhin Bharatiya Nyaya Sanhita (BNS) hnuaiah leh, public property tichhiaa puhna, Prevention of Damage to Public Property Act Section 3 hnuaiah thubuai ziahluh an ni.