BJP-in an MP Kangana Ranaut an khak

BJP chuan an party MP, Kangana Ranaut chu ram chhunga loneitute nawrh huaihawt mek chungchang a sawidanah khakin, hetiang zawnga thu sawi tawh lo tur hian hriattir a nih thu an sawi.

Kangana hian X-a video a post-ah, loneitu nawrh huaihawt mekte chuan Bangladesh dinhmun angah India ram a thlenpui thei a ni tiin, nawrh huaihawtna hmunah hian pawngsualna te thlengin, ruangte chu khai an ni a, hei bakah nawrh huaihawtna phenah hian ram dang an inrawlh niin a puh bawk.

Loneitute chungchanga a thusawi avang hian Kangana Raut hian sawisel a hlawh nasa hle a, eptu party-te bakah, a awmna party BJP ngei pawhin an thlawp lo a ni. BJP pawhin thuchhuah siam nghalin, "Loneitute nawrh chungchanga Kangana thusawi chu party ngaihdan a ni lo. BJP chuan a thusawi hi a thlawp lo a, party policy kaihhnawih thilah hetianga thu sawi tur hian thuneihna leh phalna pawh pek a ni lo," a ti. Kangana hi hetiang thu sawi tawh lo tura hriattir a ni tiin an tarlang.

Eptute chuan Kangana thusawi chu BJP beihna remchangah an hmang nghal a, loneitu pawl pawhin Kangana Raut chu ngaihdam dil turin an phut bawk.

Congress party thupuangtu, Supriya Shrinate chuan inthlanah mipuite chuan BJP chu an phu ang chhanna an pe dawn a ni tiin, "Kangana hian loneitute nawrh huaihawtna phenah America leh China inrawlh niin a sawi a, prime minister Narenda Modi kaihhruaina hnuaiah ram dang inrawlh ngai khawpin kan ram hi a lo tlachhe tawh em ni?" a ti.

Loneitu pawl, SKM leh AIKS chuan BJP MP thusawi chu na takin an dem thu an sawi a, thupha a chawi lo a nih chuan an laka lungawi lohna lantira nawrh huaihawt bakah, complaint pawh an theh lut dawn niin an sawi.

Lok Sabha-a leader of opposition, Rahul Gandhi chuan Modi kaihhruai sorkar chuan loneitute hnena a thutiamte a hlen lo ringawt ni loin, a deusawh zui a ni, a ti. "BJP MP chuan loneitu, ni 378 chhung zet an thil phut nawra an beih chhunga an ṭhiante 700 chan tute chu, pawngsual hmang leh ramdang sorkar aiawha thawk chhuakte niin a puh a, hei hi BJP-in loneitute a ngaihven tak tak loh zia leh an rilru dik tak a tilang chiang hle a ni," tiin, BJP MP video siam chu ram puma loneitute hmusitna leh deusawhna lian tak a nih thu a sawi a ni.