Rajya Sabha-ah NDA-in majority nei thei ta

Rajya Sabha seat ruak hnawhkhatna atana by-election neih zawh takah, rorellai BJP member pakuate leh National Democratic Alliance (NDA) hnuaia a thawhpui pahnihte chu chuhtu awm loin thlan tlin a ni. NDA hian a vawikhatna atan Parliament Upper House, Rajya Sabha-ah majority a nei thei ta.

BJP hian an candidate pakua tling tharte nen hian Rajya Sabha-ah seat 96 a nei tling ta a, NDA hnuaia a thawhpuite nen seat 112 an nei tling a ni. Heng bakah nominated paruk leh independent member pakhatin NDA hi an thlawp bawk.

Rajya Sabha-ah hian seat 245 awm mahse, tunah hian seat pariat a la ruak a, hengte hi Jammu and Kashmir-a seat pali leh nominated seat pali an ni. Tuna member awm zat hi 237 niin, majority nei tur hian seat 119 neih tlin a ngai. Nominated seat-ah hian sorkar laiin a rawt te dah an nih ṭhin avangin, seat pali ruak hi hnawhkhah tura dahte chuan NDA hi an thlawp leh ngei a rinawm bawk. NDA hian Parliament in hnihah majority a neih ve ve tak avangin bill pass kawngah pawh sorkar tan kawng a awlsam sawt tawh tura rin a ni.

By-election neih zawh takah chuhtu awm lo thlan tlin zingah Congress member pakhat a awm ve bawk. Eptu lam hian Rajya Sabha-ah hian seat 85 an nei ve mek bawk.

Rajya Sabha-a eptu hruaitu, Leader of Opposition ni tur hian a awmna party-in seat 25 a neih tlin a ngai ve bawk. Tunah hian Congress party chuan seat 27 neiin, party president Mallikarjun Kharge chu LoP a ni mek.