Land Bill: Sonia-in Hazare hnenah a thlawp thu a hrilh Gadkari-a'n debate neihpuiah Sonia leh Hazare a sawm

Congress President Sonia Gandhi chuan social activist, Anna Hazare chu lehkha thawnin, BJP kaihhruai NDA sorkarin Land Acquisition Act, 2013 thlak danglam a tumna a dodal chu a thlawp tih a hrilh. Cong­ress party pawhin bill thlak danglam tum hi duh loin an bei let zel dawn tih a hrilh bawk.

Hazare hnena lehkha a thawnah, Sonia Gandhi chuan, "NDA sorkarin land bill thlak danglam a tum, Parliament-ah pharh tawh chu loneitute ṭhatna tur a ni lo tia i sawi hi ka ṭawm a ni," a ti. Kawng hrang hrangin an party chuan he bill hi an dodal zel dawn tih sawiin, Thawhlehni pawh khan Parliament aṭang Rashtrapati Bhavan panin eptu party 14-te chuan bill siam danglam duhloin kawng an zawh tih a sawi.

Anna Hazare hian loneitute duhsakna lantir lo zawnga land bill siam danglam hi dodal zel tura ngenin eptu party hrang hrangte chu lehkha a lo thawn tawh a, Rajya Sabha-a pharh a nih hun­ah pawh bill hi pass a nih lohna tura dang turin a ngen. Lok Sabha-ah land bill hi pass a ni tawh a, Rajya Sabha-ah ngaihtuah a ni ve leh dawn a ni. Mahse Rajya Sabha-ah NDA hian majority a neih loh avangin awlsam tak chuan a tlang thei dawn lo a ni.

Nimin khan Union Transport Minister Nitin Gadkari chuan Cong­ress President Sonia Gandhi leh eirukna dotu Anna Hazare-te hi lehkha thawnin, land bill chung­changah open debate neihpui turin a sawm.

Minister chuan eptu pawl bakah NDA hnuai­a BJP thawhpui party ṭhenkhattin an dodal, land bill siam danglamna hi political party hrang hrang hruaitute leh social activist-te nen zalen taka sawi ho a duh thu a tarlang a, NGO-te pawh a sawm tel bawk.