Rel-ah MP minister leh a nupui rawk an ni

Madhya Pradesh finance minister Jayant Malaiya, a nupui Dr Sudha Malaiya leh passenger dangte chu nimin zing khan Delhi pana an kal laiin Jabalpur-Nizamuddin Express relah rawk an ni.

Minister leh midangte rawk an nih laiin rela-ah hian venhim hna thawktu, Railway Protecton Force-te pawh an awm a, mahse silai mu an nei ngah tawk lo nia sawiin an pui duh lo niin minister chuan a sawi.

Rel-a inrawkna thlen hun lai hi zing dar 4 vel, Mathura an tlan tlang lai vel nia sawi a ni.

Minister nupui, Dr Sudha Malaiya chuan, "Tute'n emaw na takin kawngkar an rawn kik a, emergency thil a nih ringin kan lo hawng a, kan hawn veleh mi panga silai keng an rawn lut nghal a ni," a ti.

Misualte'n an rawk lai hian RPF mite pawh hi an awm a, mahse silai mu an ngah tawk lo tia sawiin an tlanchhia niin Malaiya chuan a sawi. Hemi hnu hian mi­sualte hian passenger-te hi rawkin, an thil hlu neihte an laksak a, pindan dang pawh an rawk tel bawk.

Delhi an thlen veleh Malaiya hian Parliament panin, Railway Minister Suresh Prabhu a hmu nghal a ni. Railway minister chuan thil thlen dan chu chhui chiang turin thupek a tichhuak a, Uttar Pradesh police-te chu report pe tura a hriattir bakah, RPF sipai pathum pawh suspend nghal an ni.