IAS officer-te'n PM hnenah petition an theh lut

Karnataka-a Indian Administrative Service (IAS) officer-te chuan Prime Minister hnenah petition thehlutin, an thawhpui DK Ravi-a thih dan chu CBI chhuitir turin an ngen.

Hemi hma hian voluntary trust, Uttishta Bharatha hmalaknain PM hnenah on-line petition thehluh a lo ni tawh bawk a, hetah hian mi nuai 13.5 in hming an ziak.

Additional Chief Secretary (Environment, Forest and Ecology) M Madana Gopal chuan IAS officer Ravi thih dan state sorkarin a chhuitir mek chu an ring tawk lo a ni lo tih a sawi a, "An ti thei ngei ang tih kan ring a, mahse he thihna chungchang hi chu a dan a dang a, chuvangin independent agency chhuitir se kan duh a ni," a ti.

Karnataka-a eptu pawl, BJP leh JDS MLA-te pawhin Ravi thih dan hi CBI chhuitir phutin zan hnih chu Assembly building-ah nawrh an huaihawt tawh a ni.

DK Ravi hi Bengaluru-a a chenna inah thi-a hmuh a ni a, police-te'n a thih dan an chhuina report an tihchhuah hmasakah chuan mahni intihlum niin an sawi.

Union Home Minister Rajnath Singh chuan Karnataka Chief Minister Siddaramaiah biain, DR Ravi thubuai chu CBI kuta hlan turin thurawn a pe.

Bengaluru, Karantaka-ah Ravi-a thihdan CBI chhuitir phutin nawrh huaihawt chhunzawm a ni a, nimin khan nawrh huaihawttu BJP youth wing leh police-te an innawr buai, police-te'n mipui pungkhawmte hi tiang nen an hnawtdarh a ni.

DK Ravi hi officer hnathawk ṭha tia sawi a ni a, khawpui chhunga dan loa hnathawka chhiah awlrute dapchhuah hna a thawk a, dik lo taka thiltite tam tak a hai­chhuak a, hei vang hian mi ṭhenkhat ngaihmawh a hlawh phah hle a ni.