Sorkar laipuiin Citizenship Act siam ṭhat a remti

Sorkar laipui chuan Citizenship Act en nawn a siam ṭhat a remti. Refugee te himna tur ngaihtuahin he dan hi siam ṭhat a ni dawn niin tar lan a ni. Hindu leh Sikh te chuan India-ah hian document fel lo vangin visa pek an ni lo fo a, India khua leh tui an ni thei lo bawk. Citizenship Act siam ṭhat chungchangah hian high-level meeting neih a ni a, home minister Rajnath Singh chuan kaihruaiin foreign secretary S Jaishankar chuan a telpui.

India ramah hian Hindu leh Sikh te chu sakhaw thil leh thil dang avang tein Pakistan, Bangladesh leh Afghanistan aṭang tein an lut fo ṭhin. Refugee te hian document kimchang an neih loh avangin long-term visa (LTV) leh India khau leh tui nihna kawngah harsatna an tawk a ni. He mi avang hian Citizenship Act chu siam ṭhat rawnna a awm ta nia ngaih a ni. Home ministry official chuan, "Refugee tam tak document kimchang neilo ten visa leh India khua leh tui nihna kawngah harsatna an tawh lona turin sorkar laipui chuan Citizenship Act siam ṭhat hi a remti ta a ni" a ti. Kum 2014 Lok Sabha election khan BJP chuan India chu Hindu te inpuiah an siam tur thu an lo tlangaupui tawh a ni.

Prime Minister Narendra Modi chuan ramdanga Hindu refugee ten harsatna an tawk ṭhin chu pawi a tih thu a lo sawi tawh a, an tan hian India chu a inhawng reng a ni a ti. Modi sorkar hian Hindu leh Sikh te tan hian hamṭhatna hrang hrang visa, PAN card, Aadhaar card, driving licence, bank account leh thil dangah te a lo siam sak tawh bawk. Home ministry chuan visa leh citizenship chungchangah hian district level special camp, Gujarat, Madhya Pradesh, Rajasthan, Uttar Pradesh, Karnataka, Maharashtra, Andhra Pradesh, Haryana leh Delhi-ah te neih a nih tur thu a puang. Citizenship Act hi siam ṭhat a nih chuan Refugee zinga naupang te chu school, college, university leh technical bakah professional zirnaah te foreigner quota pek an ni ang.