Sorkarin Naik-a thusawi chhui dawn

Home Minister Rajnath Singh chuan Islamic Research Foundation dintu, Zakir Naik-an inhuatna chawk tho thei zawngin thu a sawi nia sawi chu sorkarin a chhui chiang dawn a, a ṭul angin action pawh a la dawn niin a sawi.

Zakir Naik hi Peace Television channel dintu a nih bakah, Peace TV Bangla leh Peace TV Urdu dintu a ni bawk. Inhuatna chawk tho thei zawnga thu a sawi hian tun hnaia Bangladesh khawpuia pawikhawihna rapthlak tak thleng, ram dang mi 20 leh police 2 in an thihphahna pawh kha a thlen phah nia puh a ni.

Maharashtra sorkar pawhin Islamic zirtirtu Zakir Naika thusawi chungchang hi chhui chiang turin thupek a tichhuak bawk. A thusawi chungchang buaipui a nih tak avang hian South Mumbai-a Islamic Research Foundation office pawh venhimna pek nghal a ni.

Naik chuan thuchhuah siamin, Dhaka-a pawikhawihna thleng chu a thusawi avang a ni lo tih a sawi, "Vawikhatmah ka thusawiah midangte, Muslim leh Muslim lo pawh that tura fuihna thu ka chhakchhuak lo" a ti.

Maharastra Chief Minister Devendra Fadnavis chuan Mumbai Police Commissioner hnenah thil awmdan chhui chiang a, report thehlut thuai tur a hriattir thu a sawi. Naik-a thusawi te, a social media account te, a foundation enkawlna tura a sum hmuh dante chu chhui chian vek a nih tur thu a sawi.

Information and Broadcasting Minister M. Venkaiah Naidu chuan media lamin Naik-a thusawi nia an tarlan chu a dik a nih chuan ngaihzam theih a nih loh thu a sawi a, Minister of State for Home Kirean Rijiju pawhin Naik-an a thusawiah Muslim-te firfiakte thlen ṭhin fakna lam hawi a lo sawilang a nih chuan a lakah action lak a ngei ang, a ti.