J&K-ah ration card lem nuai 11 manchhuak

Jammu and Kashmri sorkar chuan state chhungah ration card lem nuai 11 chuang a haichhuak. Ration card lem tam lutuk hian public distribution sytem pawh a khawih buai pha hle a ni.

National Food Security Act hman a nih hnua thuneituten ration card an enfiahnaah card lemte hi an hmuchhuak a ni. State food minister, Choudhary Zulfikar chuan, "Ration card lem manchhuah nuai 11 chuang zet hi kan tichhe nghal a, hei vang hian thla tinin buhfai quintal 5,500 kan hum theih phah a ni" a ti.

Sorkar official-te chuan dik lo taka man tlawma ration lak theihna tur card lem nuai 11 an hmuhchhuah thu leh, hei bak pawh hi a la awm an rin thu an sawi. Ration card tharte chu uluk taka finfiah an nih hnuah an pechhuak ṭan tih an sawi bawk.

Hetihlai hian mipuite chuan Food Security Act hnuaia buhfai an lak theih ang zat chu pek an ni lo tih an sawi thung a, a man tlawma lei tur tam tak pawh man toa lei tir an ni tih an sawi.

Sorkar laipuiin man tlawma lei theih tura buhfai an pekchhuahte tihchingpen a nih lohnatura fair price shop-a electronic point-of sale machines (e-PoS) hmanga tura a hriattir chu state 15 chuangin an la zawm lo.

Union Food Minister Ram Vilas Paswan chuan e-PoS hi state tam takin a la hmang lo tih sawiin, Pubjab, Goa, Assam-ah chuan e-PoS device pakhat pawh dah a la ni lo a, Maharashtra leh Haryana-a fair price shop zingah he device hmang hi 1% pawh an la tlin loh thu a sawi. Minister chuan he thil hi NDA leh non-NDA state chungchang thil a ni lo a, state tinin buhfai chingpen ṭhin venna atana an hman a ngai a ni, a ti. State hrang hrang hnenah pawh ziaka ngenna thawn a tum thu a sawi.

Delhi-ah chuan e-POS device hi dawr 2,534 zinga 38 in an hmang. Andhra Pradesh, Madhya Pradesh leh Daman and Diu-ah chuan fair price shop zawng zawngah an hmang tawh a, Gujarat leh Chhattisgarh-ah chaun dawr zinga 90% chuangin an hmang tawh bawk. Dadra and Nagar Haveli, Chandigarh leh Puducherry-te chuan direct benefit transfer an hman avangin fair price shop hi an titawp thung.

Ram pumah fair price shop hi nuai 5.30 vel a awm a, heng zinga nuai 1.24 chauhin e-PoS machine hi an la hmang a ni. Sorkar laipui chuan dawr zawng zawngah he khawl hi kum 2019, March thlaah hman tir vek hman a tum.