Kashmir-a tharum thawhna thlengah mi 11 an thi

Jammu and Kashmir-a Kashmir Valley-a hel pawl, Hizbul Mujahideen hruaitu Burhan Wani kahhlum a nih avanga kar kalta Inrinni-a mipuiten lungawi lohna an lantirnaa tharum thawhna thleng vangin mi 11 an thi a, mi 126 in hliam an tuar. Hliam tuar zingah hian security force mi 96 an tel.

Buaina chhuak vang hian curfew puan nghal a ni bawk.

Wani hi kar kalta Zirtawpni khan Kashmir chhim lam, Anantnag district-a Kokernag biala security force-te nen an inbeihnaah kahhlum a ni.

Mipui thinrim hian police station beiin an hal a, police-te ralthuam kawlte chu amahni beihna atana hmang zuiin, police pathum an kap hliam a, chin hriat lohin pathum an la awm bawk.

Sorkarin punkhawm khapna thupek siam mah se, Inrinni-a Pulwama-a Tral khuaa Wani vuina inkhawm buatsaihah mi 20,000 chuang an pungkhawm a ni. Pungkhawmte hian Islam an thlawpna thu te aupuiin,
ṭhalaite chuan Wani hnungzui an tum thu an sawi. Mipuiten lungawi lohna an lantir karah helho hian Pulwama-a police station leh Tral-a tehsildar office an bei a, kawngpuia private leh public motor awmte an bei tel bawk a ni.

Buaina chhuak vang hian nimina school leh university exam turte ṭhulh a ni, NET exam tur pawh sawnhlat niin State Public Commission interview neih tur pawh sawn a ni bawk.

Chief Minister Mehbooba Mufti chuan mipuite chu inthunun turin a ngen a, nawrh huaihawtnaa thi leh hliam an awm chu pawi a tih thu sawiin, security force-te chu mipuite thunun an tumna kawngah tharum hmang lo turin a ngen bawk. CM chuan tharum hman chuan mipuite tan chhiatna a thlen a ni, a ti. Hemi rual hian ṭhalaite chu Kashmir mite thihna hmanga verther taka politics kheltute laka fimkhur turina chah nghal bawk.

Union Home Minister Rajnath Singh chuan sorkar laipui chuan J&K state-a boruak ralmuang a awm theihna turin state sorkar chu a thawhpui zel dawn tih a sawi a, tharum thawhna thlenga thi an awm chu pawi a tih thu a sawi.

Inlakhran duhtu zinga mi, Syed Ali Shah Geelan,Mirwaiz Umer Farooq leh Yasin te chuan Wani thah a nih avang leh security force-te kuta thi an awm belh zel avanga nimina lungawi lohna an lantir chu vawiin-ah pawh chhunzawm an tum tih an sawi.