Charity tana sum thawh Islamic hruaituin a hmang peng

11th July, 2016

Tunlaia buaipui hlawh tak, pawikhawihna chawk tho zawnga thu sawia puh, Islamic preacher Zakir chu Maharashtra sorkar chuan a chhui mek. Hetihlai hian Zaik hian a charity hmanga sum a laklutte chu a thuthlung puanchhuahna atana a TV channel a siam, Peace TV tan a hmang peng ṭhin nia sawi a ni.

Zakir Naiv hian UK-a in register, charity Islamic Research Foundation (IRF) International a din a ni. He charity hming hian sum tam tham tak a dawng ṭhin.

He NGO hi kum 2007 khan din a ni a, a tir a tum ber chu zirna chawilarna leh hnam hrang hrangte lungrual taka an awm theihna tura hma lakna atan tih a ni. Mahse a hnuah a thil tum ber chu Peace TV enkawlna tur sum tuak a ni tih hriatchhuah a ni ta nia sawi a ni.

Naik hian thu a sawinaah Islam firfiak, pawikhawihna thlen
ṭhinte fak zawnga a sawi avangin Bangladesh khawpui, Dhaka-a pawikhawihna rapthlak tak thlentute a fuih phur nia puh a ni a, hei vang hian a thusawi hi chhui chian mek a ni. Hei bakah hian IRF hminga ram dang aṭanga ṭanpuina sum a dawn ṭhinte zepruah puh a nih avangin chhui meka ni bawk.

Home Ministry official chuan IRF hnathawh dan leh sum hman dante hi chhui chiang turin July 8 khan thupek a tichhuak a, IRF hian a sumte hi politics kaihhnawih thilah leh, Islam sakhua zawm tura ṭhalaite hipna atan te a hmang ṭhin nia sawi chu chhui a ni dawn tih a sawi. Hetianga NGO sum hman hi Foreign Contribution Regulation Act (FCRA) kalphung kalh a nih vangin, dan an bawhchhia a nih chuan hremna pek theih an ni ang.

Maharastra Chief Minister Devendra Fadnavis pawhin Mumbai Police Commissioner hnenah Naik thusawi hi chhui chiang a report thehlut turin a hrilh tawh bawk. Fadnavis chuan Naik-a thusawi bakah hian a social media account zawng zawng leh a sum hmuh dante pawh chhui a ni dawn tih a sawi.

Hetihlai hian Naik chuan thuchhuah siamin, a thusawi avanga Dhaka-a pawisawilo te nunna laksak nia an puhna chu thu dik lo a nih thu a sawi a, englai pawhin Muslim leh Muslim ni lo pawh, tualthahna thlen tura fuih zawngin thu a sawi ngai lo tih thuchhuah siamin a tarlang.