India-ah HIV vei nuai 21 dawn awm

Union Health Ministry officer chuan India ramah HIV positive mi nuai 21 dawn an awm tih a sawi a, an zinga nuai sarih vel chuan HIV hrik hi an kai tih pawh an hre lo niin a sawi.

Kar kalta Inrinni-a Chandigarh-ah thu a sawiah, Additional Secretary, Health cum Director General NACO (National Aids Control Organisation) Navreet Singh Kang chuan HIV hrik kaite hian an inhriatchian a, enkawlna a lak vat a ngai tih a sawi.

Kang hian Chandigarh-a 'HIV prevention, treatment and care programme for Punjab prisons' programme hawnna inkhawm a hmanpui a ni.

Kang chuan tan-ina tang mek zinga HIV/AIDS veite chu pawn lama he natna veite enkawlna pek ang bawk pek an ni ve tur a ni tiin, 'National Prison HIV Strategy' chu rampumah a tahtawla kalpui a ni dawn tih a sawi.

"Kumin February thla khan hmarchhak state pariatah 'HIV interventions in prison settings' project chu hawn a ni a, tunah hian Punjab leh Chandigarh tan-inah hawn leh a ni. He program atana thil pawimawh tak pakhat chu HIV laka inven dan leh a veite enkawlna pek dan tur inhrilhhriat a ni" tiin Kang chuan a sawi.

Punjab Principal Secretar Health, Vini Mahajan pawhin state Health Department chuan jail-a tangte damdawi lama enkawlna ṭha pek an nih theih nan Prisons Department chu theihtawpin a thawhpui zel dawn tih a sawi bawk. Mahajan chuan HIV Intervention Programme for Prisons chu NACO chuan Punjab-a central jail pariat-ah a hawng tawh tih a sawi bawk.