Gujarat tuilian vanga nunna chan 28 tling; Mi 40,000 chuang awmhmun sawn ngai

Gujarat hmun ṭhenkhat, a bikin khawthlang lamah ruahtui tla nasa vangin tuilian an tuar mek. Tuilian vang hian mi 28 in nunna an chan tawh.

Nilaini thleng khan chawl loin ruah hi ni li chhung a sur tawh a ni. Vadodara khawpui chu a tuar nasa ber niin, khawpui chhung hmun ṭhenkhat chu tui hian feet 10- 12 a thukin a chim tawh a ni. Vadodara chuan dinhmun derthawng taka an awm avang hian state sorkar hnenah hian Indian Army te puihna leh chhawmdawlna dil turin an ngen a ni tih official chuan an tarlang.

Ruahsur nasa avang hian Gujarat huam chhungah hian ni thum chhungin nunna chan 28 an awm nia sawi a ni a, mi 40,000 chuang chu he tuilian avang hian hmunhim lamah sawn chhuah an ngai tih state commissioner Alok Kumar Pandey chuan a sawi.

India Meteorological Department (IMD) in an tarlan danin Saurashtra biala district ṭhenkhatah chuan ruah hi nasa takin a la sur dawn a. Vadodara hmun a ruahtui tla te chuan ziaawm lam pan mah se a khawpui hmun hniam lai ṭhenkhat chu khawpui chhung tan tlanga luang, Vishwamitri lui lian chuan a la chim a, mihring chenna hmun leh building te bakah kawngpuite pawh a la chim nasa hle.

Lui lian hian a chim chin hlauhawm zawng tehna feet 25 chu Thawhlehni zing khan a chim pha tawh a, Ajwa Dam aṭang chuan tui paih chhuah a ngaih phah hial. State Health Minister leh thupuangtu ni bawk, Rushikesh Patel chuan Nilaini khan Vadodara khawpui dinhmun thlithlai hian a kal tawh bawk.

Tuilian vangin Gujarat hmun hrangah harsatna a thleng tih hriain, prime minister Narendra Modi chuan state chief minister Bhupendra Patel chu a bia a, thil ṭul leh buaipui ngaite ngaihven thuai turin leh chhawmdawl ngaite tana tawmhimna turte buaipui thuai tur te, khuarel chhiatna thleng vanga harsatna nasa zawk a thlen loh nan a tih tur ang ang te ti fel thuai turin a hrilh.

Official-ten an sawi danin, Chief Minister chuan National Disaster Response Force (NDRF) team nga chah luh belhin, Army column pali pawh Vadodara tuilenna hmuna ṭanpuina hna thawk turin a tir tih an sawi. Ahmedabad leh Surat hmun aṭangin Vadodara ah hian chhanchhuah hna thawhna turin lawng pawh thawn luh an ni bawk a ni.