NCP-in Shivaji lim chhiat vangin lungawilohna lantir

Maharashtra deputy chief minister, Ajit Pawar kaihhruai Nationalist Congress Party (NCP) chuan Chhatrapati Shivaji lim a chhiat vanga lungawi lohna lantir nan te, he chhiatna thlenga mawphurtute chunga hremna lekkawh a nih theihna tura phut nan silent protest an nei.

State NCP president Sunil Tatkare chuan thuchhuah a siamah,"Malvan-a Rajkot Fort hmuna Chhatrapati Shivaji Maharaj lim an din, thla riat lek chhunga a tlu chhe leh mai chuan rilru a ti na hle a ni, " tiin a tarlang. He thil thleng hi ngaihthah theih a nih loh mai bakah hmalam hun atana hetiang thil lo thleng leh mai thei tur laka invenna atan hian lungawilohna lantirna atan state chhung hmun hrang hranga rally an neih bakah nimin, August 29 chawhma dar 11:00 aṭanga 12:00 khan Shivaji lim awmna hmaah hian 'Silent Protest' an nei a ni.

NCP chuan Maharashtra sorkar chu Rajkot Fort kawtah hian Shivaji Maharaj lim thar chu rang taka din leh thuai turin an phut tih an sawi bawk.

Shivaji lim tlu chheta hi feet 35-a sang niin, December 4,2023 khan prime minister Narendra Modi-a'n ropui takin a hawng a ni. He lim hi Thawhṭanni khan a tlu chhia a, politics lama inbeihna nasa tak a thlen tir bakah eptu pawl, Congress nena thawk ho, Shiv Sena(UBT) leh NCP(SP) te chuan he thil thleng vang hian chief minister Eknath Shinde chu bang turin an phut.

Mi lim chim vanga Public Work Department-in complaint a thehluh behchhanin, mi lim siam hna thawhnaa thawktu pahnih projector contractor Jaydeep Apte leh structural consultant Chetan Patil te lakah thubuai ziah luh a ni tawh. PWD chuan lim siamna atana nuts leh bolts hmante chu a tuiek vek tawh niin an sawi.