Kashmir-ah curfew puan chhunzawm

Hizbul Mujahideen commander, Burhan Wani kahhlum a nih avanga mipuiten lung≠awi lohna an lantirnaa tharum thawhna thleng vanga mi 21 an thih hnuah, kar kalta Inrinni khan Kashmir Valley-ah curfew puan a ni a, nimin thleng khan curfew hi puan a la ni.

Buaina chhuaka thi te hi nawrh huaihawtnaa tel mi 21 leh police driver an ni a, Anantnag, Shopian, Kulgam leh Pulwama district-a security force-te nen an innawr buaina avanga thi an ni.

Zirtawpni khan South Kashmir-ah mipui thinrimin police pathum an hreng a, a hnuah heng mite hi him taka chhuah leh a ni. Mahse an ralthuam kawlte chu mipui hian an chhuhsak niin police-te chuan an sawi.

Mipui pungkhawm hian police station pali, civil administration office 36 leh motor eng emaw zat an tichhia a, buaina chhuakah hian civil mi 100 leh police 100 chuangten hliam an tuar bawk a ni.

Buaina a punlun zel tur venna atan state thuneitute chuan inlakhran duhtu pawl hruaitu hrang hrangte chu pawn chhuak thei lo turin a hreng nghal a, an zingah hian Syed Ali Geelani leh Mirwaiz Umer Farooq pawh an tel.

Jammu-a Amarnath Yatra biakzin hmanga kal, mi 15,000 vel chu buaina chhuak vang hian Jammu-a base camp-ah an tangkhang mek a, camp-ah hian thlen belh an awm reng bawk a ni. Police-te chuan Amarnath shrine awmna, Kashmir Valley lamah chuan tumah kalchhuah an phalsak rih lo.

Jammu and Kashmir Chief Minister Mehbooba Mufti chuan Pathianni khan cabinet meeting a ko a, Kashmir Valley-a muanna a awm theih nan eptu party leh inlakhran duhtu pawl hrang hrangte chu sorkar thawhpui turin a sawm. Buaina chhuaka police kut tuara civil mi thi an awm chu a dem thu a sawi. CM chuan security force zinga danin a phal tawk china che an awm chuan chhuichian zel an nih tur thu a sawi bawk.

Union Home Minister Raj≠nath Singh pawhin J&K CM hi biain, a ṭul angin sorkar laipui chuan a puih zel tur thu a hrilh. BJP hian J&K-ah PDP nena thawkdunin ṭangrual sorkar an siam mek a ni.

Inlakhran duhtu pawl hruaitu, Syed Ali Shah Geelani chuan mipuite chu police station bei lo tur leh, tharum thawhna thlen lo turin a ngen a, boruak ralmuang a awm theih nan theihtawp chhuah ṭheuh turin a ngen.

Nimin thleng khan J&K-ah hian internet service tihtawp a la ni a, Srinagar-Jammu national highway pawh khar niin, rel service pawh tihtawp a la ni bawk.