Indian Railways-in Tejas Express tlantir thuai dawn

Indian Railways chuan kumina Budget session neih laia Railway Minister Suresh Prabhu-an a lo puan tawh angin, rela zin ṭhinte tana world class facilities pek theihna tur Tejas Express tlantir thuai a tum.

Tejas relte hi high-tech entertainment unit-a thuam niin, Wi-Fi facility bakah braille display pawh a awm tel dawn a, khualzinte chu nuamsa taka zintir a tum a ni. Rel pindan hrang hrangte chu rangkachak rawng hnawih an ni ang. Minister hian Tejas bakah world class facility pek theihna tur rel dang, Humsafar, Antodaya leh Deen Dayalu-te pawh tlantir an nih tur thu a lo sawilang tawh bawk a ni.

Tejas, Hamsafar, Antodaya leh Deen Dayalu rel pindan duan dan tur hi tihfel a ni tawh a, production unit hnenah pawh an ruahman ang thlapa siam tura hriattir an ni tih senior Railway Ministry official chuan a sawi.

Tejas relah hian Executive Class leh Chair Car a awm ang a, Hamsafar hian AC pindan pathum a nei bawk ang. Tejas pindante hi thil thar 22 hmanga thuam an ni ang a, heng zingah hian passenger tin tana hand phone socket te, safety instructin hriattirna tur LED board te a tel. Bio-vacuum toilet, sensorised tap leh hand drier-te pawh dah a ni dawn a ni. Tejas leh Hamsafar rel-ah hian CCTV, fire and smoke detection leh suppression system dah a ni bawk ang.