Covid-19 hri kai nuai 35 chuang awm tawh
India ramah nimin thleng khan hri kai hmuh chhuah nuai 35 chuang an awm tawh a, enkawl dam tawh nuai 27 chuang an awm tawh bawk. Ministry of Health and family Welfare-in nimina report a tihchhuahah chuan hri kai hmuh chhuah thar 78,761 an awm a, hei nen hian ram chhung hmun hrang hrangah hri kai hmuh chhuah 35,42,733 an awm tawh a ni.
Ni khata dama puan pawh an tam ṭhin hle a, nimin khan mi 64,935 lai chu dama puan leh niin hri kai tawh zinga 27,13,933 lai chu damin an chhuak leh tawh. Mi 948 thi lehin hripui vang hian India ramah mi 63,498 an thi tawh a, mi 7,65,302-in hri an la kai mek bawk.
Hri kai dam leh tawh rate hi 76.61% a ni a ni a, thihpui rate chu 1.79% a ni thung. Hri kai mek zinga 0.29% chu ventilator hmanga enkawl an ni a 2% vel chu ICU-a enkawl an ni thung. India rama ni khata hri kai hmuh chhuah thar zat hi record a ni leh a, khawvel pum ang pawhin hei aia ni khata an ram chhunga hri kai hmu chhuak tam hi an la awm lo.
Ni khatah sample mtd chuang endik
Indian Council of Medical Research (ICMR) chuan nimina report an tihchhuahah ni khatah sample 10,55,027 an endik tih an tarlang a, hri len ṭantirh aṭanga nimin thleng khan sample 4,14,61,636 an endik tawh. Sample endikna atan hian laboratory 1583 an pawmpui tawh a, sorkar laboratory 1003 leh private laboratory 580-ahte sample hi an endik a ni.