Kashmir chungchangah PM-in meeting a ko

Hizbul Mujahedeen hruaitu, Burhan Muzaffar Wani thah a nih avanga Kashmir Valley-a buaina chhuak chungchangah nimin khan Prime Minister Narendra Modi chuan meeting a ko. PM hi nimin zing khan Africa ram pali tlawha a zin a rawn haw a ni.

Nimin khan a ni lina atan Kashmir Valley-ah hian curfew puan chhunzawm a ni a, tharum thawhna thar thleng a awm lo nia hriat a ni.

Meeting-ah hian PM Modi leh hruaitu dangte chuan Kashmir Valley dinhmun hi an thlir a, meeting koh a nih vang hian Home Minister Rajnath Singh pawhin US a zin tur a ṭhulh phah bawk. Senior minister dang Arun Jaitley leh Sushma Swaraj bakah National Security Advisor Ajit Doval pawh meeting-ah hian an tel.

Kashmir Valley-a district 10-a buaina chhuak mekah hian boruak tichhe zawnga Pakistan inrawlh a tum avangin sorkar laipui chuan eptu pawl hruaitu, Sonia Gandhi, Omar Abdullah, Sitaram Yechury leh midangte chu vantlang hmaa insawichhiat leh inpuhmawh chungchang tichhuak lo tura ngenin an lo kawm tawh bawk.

Prime Minister Office-a Minister of State, Jitendra Singh chuan Kashmir biala buaina tipunlun leh tichhuak tura Pakistan inrawlh dan chungchang information pawh an nei niin a sawi.

Thawhṭanni khan Pakistan Prime Minister Nawaz Sharif-a chuan thuchhuah siamin, security force-ten an kahhlum, Kashmir firfiak pawl hotu Wani-a sunna thute a tichhuak a ni.

Central-a BJP thawhpui, Shiv Sena chuan Kashmir-a buaina thleng chungchangah Jammu and Kashmir-a PDP nena ṭangrual sorkar siamtu, BJP chu na takin a bei. Shiv Sena hian an party chanchinbu, Saamana-ah hemi chungchang hi tarlangin, BJP-in PDP a thawhpui theih chhante a zawt a, Kashmir buaina thleng mek chu ram pum himna tiderthawng thei thil a ni, a ti.