Sorkar laipui thu loin containment zone loah Lockdown a puan theih loh : Ministry of Home Affairs

Ministry of Home Affairs (MHA) chuan kar liam ta Inrinni khan Unlock 4.0 guideline  a tichhuak a, sorkar laipui rawn loin state leh Union Territory (UT) sorkarin containment zone loah lockdown an puang ngawt thei lo tih a tarlang. 

MHA-in India-a state leh UT te zawm tur, Covid-19 hri laka kan fihlim theihna tur atana Unlock 4.0 guideline a tihchhuah hi naktuk (September 1) aṭanga hman ṭan tur a ni a, he guideline hian September 31 thleng a awh ang. MHA chuan sorkar laipui rawn hmasa loin state/UT sorkarin an huam chhunga district/sub-division/city/village level-ah lockdown puan khap a nih thu a sawi.

Guideline tihchhuahah hian state leh state inkarah mihring leh bungrua chet vel khap a ni tawh dawn lo  a, phalna hranpa siam a ngai dawn lo tih tarlan a ni bawk.  Contaiment zone huam chhung ni lo, hmun dangah chuan dawrte hawn phal vek niin, dawr neitute leh thil leite chuan social distancing an zawm tur tih a la ni. 

September 21 aṭangin social, academic, sport, entertainment, cultural, religious, political function leh thil danga punkhawmna chu phal a ni dawn a, mahse mi 100 ai tam an ni tur a ni lo.Heng bakah hian September 7 aṭangin metro train service tir tawh tur a ni a, hemi chungchangah hian Ministry of Housing and Urban Affairs (MoHUA) leh Ministry of Railways (MOR) chuan MHA a rawn hmasa phawt ang. 

Metro-a veivakte zawm tur Standard Opera­ting Procedure (SOP) chu MoHUA chuan a tichhuak bawk ang. September 21 aṭangin open-air theatre hawn phal a ni dawn bawk. School, college, educational leh coaching institution-te chu September 30 thleng khar a la ni dawn a, hri laka zirlaite an fihlim theih nan heng zirna inah hian dan pangngai anga regular class kal khap a la ni. Online leh distance learning erawh phal reng a la ni a, hemi kawnga inzirtirna chu uar a pawimawh thu sorkar laipui chuan a lo sawi fo tawh ṭhin a ni.