Kawṭhalo vangin nitin naupang 300 chuang thi

Union Health Ministry chuan ramchhungah naupang kum nga hnuai lam zinga 328 vel chu nitin khawṭhalo vangin an thi niin a sawi. Hei vang hian ministry-in diarrhoea control programme a siam pawh chak zawka kalpui a, nikuma naupang vaibelchhe 6.3 hnena ORS a pek chu kuminah vaibelchhe 10 chuang hnenah pe tura hmalak a tum.

Kumtin khawṭha lo vang hian kum nga hnuai lam mi nuai 1.2 chuang an thi a, kawṭhalo natna an veina chhan tam ber chu tui leh chaw thianghlim tawk lo vang te, taksa mamawh ei tur ṭha an hmuh loh vang te, inthiarna ṭha awm loh vang leh, hri danna an lak ṭhat loh vangte a ni. Kawṭhalo vanga thihna hi nipui leh fur laiin a tam zual.

Health Ministry-a additional secretary CK Mishra chuan, "Kawṭhalo natna hri hi kan titawp thei kher lo ang a, mahse he natna vanga thihna thleng ṭhin erawh kan veng thei a ni" tiin 'Intensified Diarrhoea Control Fortnight 2016' a hawnnaah a sawi. He program hmang hian kawṭhalo natna hri veng leh he natna vanga thihna thleng ṭhin dang turin trained health worker-te kaltlangin hmalak tum a ni.

Ramchhunga naupang kum nga hnuai lam thi zinga a tam ber thihna chhan chu kawṭhalo hri vang a ni. Sorkar laipuiin nasa taka hma a lak hnuin nikum khan thi zat hi a tlahniam a, sorkar hian chak taka hma a lak chhunzawm zel a la ngai niin official chuan a sawi.

Sorkar laipui hian a hmalaknaah health agency hrang hrangte a thawhpui bawk a, an zing≠ah hian UNICEF pawh a tel a ni. Naupang kaw-
ṭhalo natna veite hnenah ORS leh ORS Zinc te sem a ni a, hemi hmang hian nikum chhung khan he natna avanga damdawi-ina enkawl ngai tura ngaih leh thihpui tura ngaih naupang nuai 21 vel a venghim thei a ni.

India ramah hian naupang kawṭhalo vei zinga 54.4% chauhin ORS hi an dawng a, naupang kum nga hnuai lam zinga 30% chu an taksa mamawh ang chaw ṭha hmu pha lo an nih avangin heng mite hi kawṭhalo natna vei hlauhawmin an awm reng bawk.