SID-in Naik thubuai siamsak dawn lo

Inhuatna leh pawikhawihna chawkchhuak thei zawnga thusawia puh, Islam zirtirtu Zakir Naik-a thusawi chu chhuichian a nih hnuah, Maharashtra State Intelligence Department (SID) chuan thubuai siamsakna tur khawp thil an hmu lo. India rama a rawn kir hnuah man a nih loh tur thu an sawi.

SID hian rampawn leh ramchhunga Naik-a thusawi hrang hrang, YouTube video za chuang zet an zirchiang a, hei bakah hian state danga intelligence team hrang hrangte thil awmdan an zawt chiang bawk.

Senior police offiical chuan, "English ṭawnga thu sawi ṭhin, Naik-a lakah thubuai siamna tur khawp thil a awm lo a, sakhaw dang betute rilru tina thei tia puh erawh a theih chauh ang. Mahse hei pawh hi a thusawi aṭang chuan a lang chuang lo. A chetvel dan zawng zawng pawh kan chhuizui a ni" a ti.

Naik-a thawhpui pakhatin a thusawina aṭanga sum a hmuhte stock market-ah a invest ṭhin tia a sawi pawh an enfiah thu sawiin, SID official-te chuan he thu sawi≠tu leh Naik hi tunhnaiah an in-
ṭhen hrang tawh a, hei bakah hian a thil tih dan chu pawikhawihna anga ngaihsak theih a nih loh thu an sawi bawk.

Thawhṭanni khan Naik hi Mecca aṭangin Mumbai rawn kir tur a ni a, mahse a tumdan hi thlakin Africa lamah a kal leh thung a, a chhungte erawh chu Mumbai-ah an rawn kir a ni.