Telengana state-in foreign ministry hran nei dawn

Telangana state chuan an state pualin foreign ministry hran a nei dawn a, state foreign minister hmasa ber atan hian KT Rama Rao dah tum a ni.

Foreign relations chu sorkar laipuiah pawh ngaih pawimawh tak a ni reng a, hei vang hian state sorkar pawhin ram dangte nena an state inlaichinna ṭha siamna atan ministry hran siam hi a tum a, NRI affairs chang mektu KTR chu ministry thar hi enkawltir tum a ni bawk niin official chuan a sawi.

Ministry thar siam tur hi sorkar chuan ni reilote hnua a puan rin a ni. He ministry hmang hian Telangana state-ah investment ti tura ram dang mi tam zawk hipluh an tum dawn a, an state chu India rama sumdawnna hmun
ṭha bera siam an tum dawn niin Bhuvanagiri MP Boora Narasaiah Goud chuan a sawi.

KTR chuan NRI policy hman thuai a tum thu a sawi a, policy thar hi an duang tawh a, July 16 hian meeting koin tihfel a ni tawh dawn a ni, a ti. Official chuan Kerala state sorkarin ramdang an state mi leh sa awmte chungchang ngaihtuah bik tura ministry a siam entawnin he thil hi ti an nih thu a sawi bawk.