PM-in India ram toy hub-ah siam tum

Prime minister Narendra Modi chuan nimin khan thla tina radio programme a hman ṭhin, Maan Ki Baat hmang lehin, India chu khawvel huapa toy hub-ah siam tum a nih sawiin, talent leh theihna hmanga India chu toy hub a nih theih thu a sawi bawk.

PM chuan khawvelah toy industry cheng vaibelchhe nuai 7 chuang hu a awm thu sawiin, hemia India share neih erawh a tlem thu a sawi. Hei vang hian India a start-up entrepreneur-te chuan ṭan la a an talent hmang leh an theihna hmanga tualchhunga toy (naupang thil) siamchhuah tamna kawngah hma la turin a chah.

Nimina PM-in Mann Ki Baat hun a hmannaah hian ramchhunga entrepreneur naupang zawkte chu computer games siam chhuak tam turin a chah a, naupang intihhlimna thil siam kawngah hian India chuan ṭan lak a mamawh a ni, a ti.  

Modi chuan September thla chu 'Nutrition Month' ah hman a ni dawn tih sawiin, school chuan report card chauh ni lo, nutrition card leh nutrition monitor-te an neih a ngai a ni, a ti. Hemi rual hian India chuan a zalenna champha vawi 75-a a lawm hnai tawh avangin, zirtirtute chu ram zalenna atana beitu, chawimawi  hlawh lo pasalṭhate chanchinte zawng chhuak a, zirlaite hnenah ram tana inpete chanchinte an hriattir a ṭul thu a sawi.