MP-ah tuilian tuar mi 9,000 chuang sawn chhuak
Madhya Pradesh-ah ruah sur nasa vanga tuilianin chhiatna a thlenah mi pariat an thi tawh a, tuilian tuar mi 9,000 chuang sawn chhuah an ni tawh bawk.
Chief minister Shivraj Singh Chouhan chuan ni hnih liam ta chhung khan tuilian avangin district 12-a thingtlang khaw 454-a cheng mi tam tak chu sawnchhuah an ni tih sawiin, khaw 40-a tangkhang mek mi 1,200 chuang chhan chhuah hna pawh thawh mek a ni, a ti. Tuilian tuarte hruaichhuahna atan hian Indian Air Force helicopter pathum hman a ni a, a dang pahnih hman belh an dil mek tih CM chuan a sawi.
Tuilian tuar mi 9,300-te chu sorkarin relief camp 170 a siamah an khawsa mek a ni. CM chuan an state-in tuilian an tawrh chungchang hi nimin khan prime minister Narendra Modi pawh a hrilh a, defence minister Rajnath Singh pawh pui turin a ngen tawh bawk tih a sawi.