J&K-ah firfiakte'n police station an bei

Jammu and Kashmir-a Kathua district-ah nimin zing khan Pakistan thlawp firfiakte'n police station an bei, sipaite'n an bei let ve nghal.

Firfiakte hi pathum niin sipai uniform an ha a, Rajbag police station-ah lutin station chhung­ah hian police panga an hreng zui a ni. Sipaite hian pawn lam aṭangin firfiakte hi an bei let a, hun eng emaw chen an inkah hnuah firfiak pa­hnih an kaphlum.

Inbeihnaah hian mi paruk an thih bakah midang 10-in hliam an tuar. Thi te hi firfiak pahnih, CRPF 2, police pakhat leh civil mi pakhat an ni. Police station beitute hi LeT firfiakte nia hriat an ni. Firfiak dang hi zawngin beihpui thlak chhunzawm nghal a ni.

Firfiakte leh sipaite inbeihna avang hian Jammu-Pathankot highway pawh khar nghal a ni a, venthawn thilah check post leh barrier te siam a ni.

Kathua district hi Jammu aṭanga km 88-a hlaa awm a ni a, police station beih a nih hma lawk hian Pakistan lam aṭangin firfiak lutru an awm tih report a ni.

Nimina Parliament inkhawmah Home Minister Rajnath Singh chuan Kathua district-a inbeihna thleng chungchang hi a report nghal a, sipaite'n huaisen taka firfiakte an beih let dan chu a fak a ni. Singh hian Home Secretary hnenah thil awmdan chu uluk taka thlithlai zui turin a hrilh nghal bawk.