Karnataka police-te'n Ravi-a phone call an chhui dawn

Karnataka-a IAS officer, DK Ravi-a thih dan chu Central Bureau of Investigation (CBI) chhuitir phutin nawrh huaihawt mah se, state sorkarin thutlukna a la siam lo. Hetihlai hian Karnataka police-te chuan an theih angin an chhui zui mek a ni.

2009 batch IAS officer, kum 36 mi Ravi hi Bengaluru-a a chenna inah thi hmuh a ni a, mahni intihlum nge midang kut tuara thi tih chhui chian mek a ni.

Ravi hian a thih hmain a thawhpui, IAS officer hmeichhe pakhat chu darkar khat chhungin vawi 44 zet a call a, text message pawh a thawn bawk. He hmeichhia hi Karnataka police-te chuan thu an zawtfiah dawn a ni. Ravi-a'n nupui a neih hmain an inkawm ṭhin a, Ravi-a Facebook page-ah pawh he hmeichhe tana post a siamte pawh a awm.

Karnataka Chief Minister hlui leh JDS hruaitu, HD Kumaraswamy chuan an state-a rorellai, Congress party chuan Ravi-a hmingṭhat tawhna tih­chhiat tumah a puh.

Eptu party-te chuan Ravi thih danah hian thil fel tawk lo a awm niin an sawi a, hei vang hian a thih dan dik tak chhui chian phutin nawrh an huaihawt mek a ni. Police report tihchhuah hmasaka mahni intihlum anga an sawi chu eptute chuan an pawm lo tih an sawi.