Pakistan-in SCO meeting-a tel turin PM Modi sawm

Pakistan chuan October thlaa an ram khawpui, Islamabad-a Shanghai Cooperation Organisation (SCO) Council Heads of Government (CHG)meeting neih tura prime minister Narendra Modi chu tel turin a sawm.

SCO CHG chairman dinhmun hi a chhawka chelh ṭhin niin, Pakistan hian tunah a kaihruai mek a ni. October 15-16 hian meeting hi neih a ni ang.

Foreign office thupuangtu, Mumtaz Zahra chuan Ningani khan ram hruaitu hrang hrangte hnena meeting-a tel tura sawmna hi an thawn tih sawiin, PM Modi pawh thawn a nih thu a tarlang. Ram ṭhenkhat chuan an tel theih tur thu pawh an tichiang nghal a ni, a ti.

SCO-ah hian India, China, Russia, Pakistan, Kazakhstan, Kyrgyzstan, Tajikistan leh Uzbekistan te an awm a, trans-regional international organisation lian ber zinga mi a tling.

India chuan nikum khan SCO Summit hi a lo thleng tawh a, mahse virtual mode-a neih niin, Pakistan prime minister Shehbaz Sharif pawh a tel a ni. May 2023 khan hetih laia Pakistan foreign minister Bilawal Bhutto Zardari chu Goa-a SCO Council of Foreign Ministers meeting hmang turin a rawn zin bawk a, kum 12 dawn chhunga Pakistan Foreign Minister zinga India ram rawn tlawh hmasa ber a ni.

India leh Pakistan inkar hi Kashmir chungchang avangin a chhe fo a, hei bakah ramri kaltlanga firfiakte rawn lut ṭhin chuan ram pahnih inkar boruak a ti chhe hle bawk. BJP kaihhruai NDA sorkarin August 5, 2019-a Jammu and Kashmir special status pekna, Article 270 a tihtawp hnuah khan Pakistan leh India inlaichinna hi a chhe zual a ni.