Maharashtra Shivaji lim chim kaihhnawihah consultant man

Maharashtra-a Chhatrapati Shivaji lim siamna tura a ruangam dintu zinga, structural consultant Chetan Patil chu Thawhṭannia Shivaji lim chim kaihhnawihah Kolhapur police chuan Ningani zan khan an man.

Malvan, Sindhudurg-a Rajkot Fort-a Shivaji lim, feet 35-a sanga siam hi an hawn aṭanga thla riat hnuah a chim leh nghal a ni.

Patil hi Thawhṭannia mi- lim chim hnu hian man hlauh vangin a bi bo tih hriat a ni a, hei hian mipuite zingah leh politics huang chhungah inbeihna leh lungawilohna nasa takin a ti punlun bawk.

Kolhapur Police, Sindhudurg Police leh Thane Police te chuan Chetan Patil leh mi lim siamtu, Jaydeep Apte te zawn hna hi an thawk nghal a, Ningani zanah Patil zawk chu an man thei ta a ni. Jaydeep Apte erawh chuan tun thlengin police man hi a la pumpelh a ni.

Mi lim chhiatna kaihhnawihah hian Maharashtra sorkar chuan Indian Navy kaihhruaina hnuaiah a chhui hna thawk tur, joint technical committee an din tawh bawk. Eptu ṭangrual pawl, Maha Vikas Aghadi (MVA) chuan chief miniser Eknath Shinde leh Deputy chief minister Devendra Fadnavis te kaihhruai sorkar chu mi lim dinna tur sum eiruah puhin, bang turin an phut bawk.