IMA-in RG Kar Medical College Principal member nihna hlip

Indian Medical Association (IMA) chuan Kalkota-a doctor zirlai pawngsual leh thah a nihna hmun, RG Kar Medical College and Hospital principal hlui Dr Sandip Ghosh chu IMA member a nihna a hlihsak.

Dr Ghosh hi IMA Kolkata Chapter-a vice chairman ni lai niin, IMA member a nihna aṭang hian disciplinary committee chuan an ban a ni. IMA ṭhutkhawm hi national president Dr RV Asokan kaihhruaina hnuaiah neih niin, a rawtna kaltlanga he thutlukna hi siam a ni.

IMA hruaitute hian pawikhawihna tuartu nu leh pa chu an chenna inah an lo tlawh tawh bawk a, "He pawikhawihna chungchanga i hmalakna leh, an chunga khawngaihna lantirna awm lo chungchangahte mawphurhna hlen lo tiin an dem hle che a ni," tiin Ghosh chungchanga thuchhuah an siamah hian an tarlang. IMA disciplinary committee chuan lungrual takin Indian Medical Association aṭanga Sandip Ghosh member nihna hlih an remti ta tih an sawi.