Sonia Gandhi-in loneitute a tlawh

Congress President, Sonia Gandhi chuan kar kalta Inrinni khan Haryana-ah loneitute tlawhin, ruahsur nasa avanga harsatna an tawh dante a hmunah a en. Hemi hma hian Rajasthan-ah loneitute a lo tlawh bawk.

Ramchhung hmar lamah ruahsur nasa avang­in loneituten harsatna an tawk mek a, an thlai chin tam tak a chhiat phah a ni. Ruahsur nasa, a hun dik loa ruahsur leh rialtla avang hian kumin chhung­a loneitute thlai thar tur hi 3% vela a tlakhniam tur thu Union Minister of State for Agriculture Mohanbhai Kundariar chuan a lo sawilang tawh a ni.

Sonia Gandhi chuan loneitute tan an party chu an ding zel dawn tih sawiin, BJP sorkarna state-te chu harsatna tawk loneitute hnena zángna­dawmna pe turin a ngen bawk. Sonia chuan loneitute lakah sorkar laipui leh state sorkar-te chuan mawhphurhna an nei tih sawiin, centre-ah an party sorkar lo mah se theih­tawp chhuahin an tana an beih zel tur thu a sawi.

Union Agriculture Minister Radha Mohan Singh chuan ruahsur leh rialtlain thlai chin a tih­chhiat dan hi enfiah a nih thu sawiin, sorkar laipui chuan loneitute ṭanpuina tur a pe dawn a ni, a ti. Sorkar laipui chuan state pasarih - Maharashtra, Madhya Pradesh, Uttar Pradesh, Haryana, Rajasthan, Gujarat leh Punjab-ahte thlai chin lai tihchhiat a nih dan enfiah tur hian central team a tir tawh a ni.

Prime Minister Narendra Modi chuan thla tina radio-a program a hman ṭhin, 'Mann ki Baat' chu nimin khan hmang lehin, he hunah hian loneitute chungchang a sawilang. Sorkar laipuiin Land Bill siam danglam a tum, eptu pawlte leh loneituten an dodal mek chu sawilangin, PM chuan he bill hi loneitute leh thingtlang mite ṭhatna tura duan a ni, a ti.

Modi chuan loneitute chu amah ring ngam turin a ngen a, sorkar laipui chuan agriculture sector leh loneitute tihchak a tum thu a sawi. Loneitute chu an harsatna neihte sorkar hnena thlen ṭhin tura chahin, sorkar chuan an buainate chu chinfel sak zel a tum tur thu a sawi.