MP loneitute hmaah PM-in thu sawi dawn

Delhi ramri hrang hranga loneitute'n nasa taka Farm law thar pathum an dodalna karah prime minister Narendra Modi chuan vawiin hian Madhya Pradesh lonei­tute hmaah thu a sawi dawn.

PM Narendra Modi hian vawiin dar 2-ah video link kaltlangin thu hi a sawi dawn a, Madhya Pradesh-a thingtlang khaw 23,000 velah a thusawi hi pek chhuah a ni dawn tih official-te chuan an sawi.

Narendra Modi thusawiah hian loneitu nuai 35 velin an dawn tur  relief package Rs vaibelchhe 1,600 hu chungchang a tel dawn a ni.

Modi hian tunhnaia hmun hrang hranga thu a sawinaah Farm law thar hum zawngin thu a sawi nasa hle a, hei vang hian vawiina thu a sawinaah hian helam hawi zawng hi a sawi leh ngei rin a ni bawk.

Tun kar tira Gujarat-a thu a sawinaah pawh PM hian eptu party-te chu loneitute rilru hruai kawiah puhin agriculture dan thar chu loneitute tana ṭha zawk tur a nih thu a sawi a ni. 

Loneitu pawl hrang hrangin duh lohna lantir mah se sorkar laipui chuan an dan siam thar chu an paih duh lo. Loneitute tan hian ruahmanna thar hrang hrang chhawp mah se loneitu lam hian an la hnawl sak zel thung.

Farm law thar pathum dodalna chungchangah hian Supreme Court-ah petition eng emaw zat a lut a ni.

SC chuan nimin khan loneitute chuan dodal theihna dan an nei tih sawiin, an duh lohna lantirnaah chuan inrawlh a tum lo tih a sawi. Mahse tualchhung mite dikna chanvo tibuai lo zawngin duh lohna lantir dan a awm em tih chu sorkar laipui hnenah an zawt dawn tih a sawi thung.

Court sang ber chuan loneitute hnenah chuan kawng an dan avangin Delhi-a cheng mi tam tak chu rilṭamin an awm tawh tih a hrilh. "Duh lohna lantir turin dikna in nei. Inrawlh pawh kan tum lo. In dodalna hian tum a nei a ni. Chu chu tihlawhtling turin tu emaw in biak a ngai. A kuma kum duh lohna lantirin sit-in protest in neih ringawt chuan awmzia a awm lo," tiin a sawi.

SC hian ni hnih chhung chu buaina a rang thei ang bera chinfelna hi a zawng a, nimin thleng kha chuan inbiakna a la tlawlh zel tih sawiin sorkar leh loneitu lamte chu panel siama inbe turin a rawn a ni.