EC-in Haryana assembly inthlan neih hun tur sawn

Election Commisison of India (ECI) chuan Haryana assembly inthlan neih tur chu state chhunga pawl hrang hrangte nawrna avangin a sawn. Vote chhiar hun tur pawh a sawn tel nghal bawk.

ECI in a ruahman hmasak dan chuan Haryana assembly inthlan hi October 1-a neih tura tih a ni a, mahse October 5-a sawn a ni tih Inrinni khan a puang a ni. Haryana leh Jammu and Kashmir-a vote chhiar hun chu October 8-ah sawn a ni bawk.

Haryana-a political party hrang hrang leh All India Bishnoi Mahasabha chuan Bishnoi hnamte chu Rajasthan-a Asoj Amavasya festival lawmnaah an kal duh dawn avangin an inthlan ni hi sawn turin ECI-ah hian a ngen a ni. He hun hi Bishnoi hnam tana hun pawimawh tak a nih vangin, vote tla pawh a tlem phah thei niin an sawi. An ngennate hi a ngaihtuah hnuah, ECI chuan Haryana assembly inthlan neih hun hi sawn an remtihsak tih an tarlang. Bishnoi annual festival, Amavas hi kumin hian October 2-ah hman a ni dawn a ni.