JD (U) thupuangtu a nihna aṭangin KC Tyagi a bang

National Democratic Alliance (NDA) hnuaia BJP thawhpui, Janata Dal (United) hruaitu, KC Tyagi chu nimin, September 1 khan party national spokesperson a nihna aṭangin a bang. Amah thlaktu atan hian Rajiv Ranjan Prasad ruat a ni dawn nia sawi a ni.

Bihar chief minister Nitish Kumar hnena lehkha a thehluhah, Tyagi chuan hna danga inhnamhnawihna a neih avangin, party spokesperson post chelhah chuan a a hna tur ang taka thawk thei lo nia insawiin, a post aṭang chuan chawlhtir turin a ngen a ni.

A post aṭanga a ban chhan hi mimal thil angin sawi mah se, tun hnai a thusawi hrang hranga party hotute lam an lawm loh vang nia ngaih a ni thung.

Tyagi-a'n tun hnaia Israel-Palestine chungchang a sawi chu party hruaitu lamte ngaihdan a ni lo a ni. Sorkar laipui chu Israel tana ralthuam a pek ṭhinte titawp tura nawrin, India chuan Gaza-a inkahhai puan chu a thlawp thu a sawi a ni. Hemi chungchangah party hotu lam a rawn lo a, NDA pawh a thusawi chungchangah hian ngaihdan a phir hle nia sawi a ni bawk.

Tyagi hi JD(U) party tana mi pawimawh tak niin, kum 2013 - 2016 khan Bihar aṭangin Rajya Sabha MP a ni a, 1989-1991 khan Hapur Constituency aiawhin Lok Sabha member a ni bawk. Tun hnaia MP hlui leh ṭanglai ṭhenkhatin Israel chet dan demna thu an siamah pawh khan a hming a lo ziak ve bawk a ni, "Insuatna thlengah hian India chu a inhnamhnawih ve tur a ni lo," an ti. Hei bakah Supreme Court-in SC/ST chungchanga thutlukna a siam leh, UPSC (Union Public Service Commission) hnuaia lateral entry job chungchanga a thutlukna siam a sawizuinaah pawh party lam thuneitute a sawipui hmasa lo bawk. JD(U) chuan Tyagi hian heng thil hrang hrangah hian a mimal thlir dan chu party thlir dan angin a sawichhuak fo niin an sawi a ni.