Hri kai hmuh chhuah thar sing nga aiin tlemHri kai hmuh chhuah thar sing nga aiin tlem

Sorkar laipuia Health Ministry-in nimina report a tihchhuahah chuan Thawhṭanni khan ni  khata hri kai hmuh chhuah thar sing nga an tling lo a, thla thum dawn hnua ni khata hri kai thar sing nga a tlin loh ṭum khatna a ni.

Ministry of Health and Family Welfare-in nimina report a tihchhuahah chuan hri kai hmuh chhuah thar 46,790 an awm a, July 23 hnua hri kai hmuh chhuah thar tlem ber ni niin, thla thum dawn chu ni khatah hri kai hmuh chhuah thar sing nga an chuang char char a, September thla laihawlah phei kha chuan sing kua chuang hmuh chhuah ni a tam hle.

India ramah hian hri kai enkawl dam rate a sang tawh hle bawk a, 88.63% chu dam tawhin hri kai mek zat pawh 10% hnuai a ni tawh a, nimina sorkar report tihchhuah thleng khan hri kai zinga 9.85% chiahin hri an kai tawh.

Hri kai dama puan thar zinga 78% hi chu state leh UT 10 aṭangin a ni a, hri kai tamna ber Maharashtra state-ah chuan hri kai dam leh ni khatah 15,000 chuang an awm a, Karnataka-ah pawh 8,000 chuang an dam bawk.

Nimin report-ah khan thih pui 587 an awm leh a, ni hnih chhung chu a zawnin hripui vanga thi 600 an tling tawh lo a, thihpui rate chu 1.52% a ni.

Prime Minister Narendra Modi chuan Grand Challenges Annual Meeting (GCAM) 2020 hawnnaa Thawhṭanni zana thu a sawinaah India ram chu Covid-19 damdawi siam chhuahna kawnga hmahruaitu a nih thu a sawi.

Narendra Modi chuan ramchhungah damdawi chi hrang hrang 30 vel siam mek a ni tih sawiin heng zinga pathum chu advance stage-ah an awm tawh thu a sawi a, damdawi delivery system changtlung tak siam turin India chuan hma a la mek tawh a ni, a ti bawk.

Sorkar laipuiin Covid-19 leng mek chungchang zirchianga, projection siam tura committee a dina member, Kanpur-a  Indian Institute for Technology professor Mahindra Agarwal chuan an chhut danin  nakkum February thlaah chuan India ram mipui, tluklehdingawn 1.3 zinga a zahve, 50% vel chuan Covid-19 an kai a rinawm tih a sawi. 

Committee-in ram chhunga hri darh dan a chhut hi sorkarin serological survey a neih aiin a sang zawk a ni. Serological survey-ah chuan September thla thleng khan India ram mipui zinga 14% velin hri hi an kai niin a sawi a, mahse committee erawh chuan 30% velin hri hi an kai tawh niin a chhut thung. 

Expert-te chuan holiday season a ni chho dawn a, Durga Puja leh Diwali te a thlen chhoh dawn avangin ram chhunga hri kai hi an pun belh nasat a hlauhthawnawm hle tih an lo sawi tawh a ni.