Malabar naval exercise-a tel turin Australia sawm

Quadrilateral Security Dialogue (Quad) pawl chuan Malabar Coast-ah a huhoin military exercise an nei dawn a, India chuan  he huna tel ve turin Australia a sawm. 

Quad member ram pali, India, USA, Japan leh Australia-te hian a vawi khatna atan India chhim lamah hian military exercise an nei ho dawn a, Malabar naval exercise tih niin November thlaah neih an tum. 

Malabar naval exercise hi a hmain Australia tel loin member ram pathumte hian an ei ṭhin a, mahse kuminah chuan Australia hi tel turin India chuan a sawm a, anni pawhin an tel dawn tih an tichiang tawh bawk. Australia hi kum 2007  hnuah Quad military exercise-ah hian a tel tawh lo a ni. 

Malabar naval exercise neih tur chungchangah hian India defence ministry chuan Indo-Pacific huam chhunga muanna leh security a ṭhat theihna tur atana tih a nih thu a tarlang a, international dan bawhchhe loa he lai hmuna hmalakna neih zel hi ṭha a tih thu pawh a tarlang bawk. Heng bakah hian Australia sawm an nih chhan chu defence lamah thawhona ṭha an neih theih nan a nih thu a tarlang tel bawk.

Hemi chungchangah hian Australia defence minister Linda Reynolds chuan an sawmna chu ngai pawimawha an tel dawn thu a sawi a, an pawl,Quad chu democracy ram lian an nih thu leh midangte tan himna an thlensak theihna turin an thawkho dawn a ni, a ti.