Srinagar-a 'Kashmir Times' chanchinbu office khar sak

Jammu and Kashmir-a Srinagar khuaa chanchinbu lar tak 'Kashmir Times' office chu Thawhṭanni aṭang khan J&K sorkarin a khar sak. 

Kashmir Times hi English daily newspaper a ni a, Jammu-ah an headquarters  a awm a ni. Thawhṭanni khan Srinagar-a 'Kashmir Times' chanchinbu office chu Estates Department official-te chuan an khar sak a ni. 

Chanchinbu executive editor, Anuradha Bhasin chuan Estates department-in an office a kharsak chungchangah, thupek leh khar tura hriattirna engmah pek an nih loh thu a sawi. Thuneitute chu mahni chipuite hrekbeh tumah Bhasin chuan a puh a, sorkar policy sawiselna ziah ṭhin a awm a, chumi chu an huat avangin an lakah hetiang hian thuneitute chu an che ta mai niin a sawi.

Bhasin chuan an office an khar sak ang chiah hian thla hnih liam ta khan Jammu-a a chenna in chu thuneitute chuan an khar sak thu a sawi a, lehkha pawh inpek awm loa an chet dan chu a dik lo a, dan behchhan an nei lo, a ti.

Kashmir Times office khar sak a nih chungchangah hian politician hrang hrangte chuan sorkar demna thu an sawi a,   J&K chief minister hlui Omar bdullah leh Mehbooba Mufti-te pawhin an twitter lamah thuneitute demna thu an ziak lang a ni.