India leh Bangladesh-in inremna pasarih an ziak
India leh Bangladesh chuan nimin khan thawhdunna tur inremna pasarih an ziak a, hetah hian hydrocarbons leh agriculture chungchangte a tel bakah cross-border railway line hawn thar lehna an nei.
Nimin khan ram pahnihte hian virtual summit an nei a, hetah hian kum 1965-a Pakistan leh India indo laia an lo tihtawp tawh cross-border railway line hawnna an nei nghal.
Prime minister Narendra Modi chuan Bangladesh chu India-in “neighbourhood first” policy a kalpuinaa lung pawimawh tak a ni tih sawiin Bangladesh prime minister Sheikh Hasina pawhin ram pahnih chuan economy leh inkalpawhna kawnga thawhdunna ṭha zawk an nei a nih chuan khawvel pumah leh ram chhehvela an hlutna chu a sang sawt dawn a ni, a ti ve bawk.
Inremna an ziah pasarihte hi hydrocarbons sector, agriculture and textile, high impact community development project India-in a kalpui tur, trans-border elephant conservation, Bangladesh-a Barishal khawpuia bawlhhlawh tihralna tur hmanraw thawn chungchang leh CEO Forum siam chungchangte a ni.
Ram pahnih hruaitute hian rail link siam thar leh virtual-a hawnna hi neiin hemi kawng hi Assam leh Bandladesh, West Bengal kaltlanga an inkalpawh theihna tur a ni. Bangabandhu Mujibur Rahman stamp an tlangzarh bakah Rahman leh Mahatma Gandhi chungchang digital exhibition an hawng nghal bawk a, he exhibition-ah hian ram pahnihin zalenna an sual dan kawngte chu thlurbing a ni ang.