Islamic zirtirtu Zakir Naik-a sum hmuhna chhui

Tunlaia thawm nei lian tak, Islamic preacher Zakir Naik-an a din, NGO Islamic Research Foundation (IRF) chuan Saudi Arabia leh UK lam aṭanga ṭanpuina sum a dawn ṭhin chu chhui a ni a, heng sumte hi helpawl lak aṭanga an dawn a ni em tih chhuizui mek a ni.

Zakir Naik hi Islam firfiakte pawikhawihna thlen sawi mawi leh, a thusawi avangin Bangladesh khawpui, Dhaka-ah cafe beihna rapthlak tak a thlen phah nia puh a nih vangin a chanchin leh NGO a din te hi chhuichian mek a ni. Ministry of Home Affairs (MHA) chuan IRF-in ramdang aṭanga sum a hmuhna file-te chu a enfiah mek a ni.

Kum 2012 thleng khan IRF hian kum nga chhungin cheng vaibelchhe 15 a dawng nia sawi a ni. IRF hian ram pawn lam aṭanga ṭanpuina sum a dawn avangin Foreign Contribution Regulation Act (FCRA) hnuaiah a in-register. Sum thawhtu ṭhenkhat chu chhui mek an ni a, hei bakah hian NGO-in a sum dawnte hi a hmanna tura an tihah an hmang nge, thil dang atan an pawt peng tih pawh chhui mek a ni bawk.

Naik-an firfiakte cho phurna thu a sawi nia sawi pawh hi sorkar lam chuan a enfiah mek a, a thusawi video-te hi youtube-ah dah niin, Muslim zingah a lar chak hle. A CD pawhin ram hrang hrangah thehdarh a ni. Mahse Naik chuan pawikhawihna thlentute cho phur zawngin thu a sawi lo tih a sawi thung.