Mipuiten police station aṭangin silai ru chhuak

Jammu and Kashmir-a Anantnag-a helpawl, Hizbul Mujahideen hotu Burhan Wani kahhlum a nih avanga tualchhung buaina chhuah hnuah curfew puan chu chhunzawm zel a ni.

Kar kalta Zirtawpni-a security force ten Wani an kahhlum vang hian mipui thinrim chuan security force-te beiin buaina nasa tak a chhuak a, Kulgam-a Damhal Hanji Pora-ah chuan mipui thinrim hian police station luhkhung≠in, station-a ralthuam an kawl, semi-automatic leh automatic silai 70 an ru chhuak.

Tral, Karalpura leh hmun dangah mipui pungkhawmte chuan security force-te ralthuam chhuhsak tumin an bei bawk.

Security force-ten an kahhlum tak, Wani hi Kashmir-ah a lar hle a, ṭhalaite chu security force-te bei a, an ralthuamte chhuhsak tur tein a lo fuih ṭhin a ni.

Kashmir Valley-a buaina thleng vanga thi hi mi 34 an tling tawh a, nimin kha a ni ngana atan hmun tam zawkah curfew hi puan chhunzawm a la ni. Curfew puan a ni chung hian Thawhlehni khan hmun 30 chuang zetah mipui leh security force-te hi an intibuai leh a ni.

Intihbuainaa sipaite silai hmehpuaha hliam tuar tam tak chu damdawi in hrang hrangah enkawl an ni a, hetihlai hian curfew puan chhunzawm a nih reng avangin damdawi-in ṭhenkhat chuan damdawi an tlachham ṭan nia sawi a ni. NGO hrang hrang, Help Poor Voluntary Trust, Athrout leh a dangte chuan damdawi-in tan hian damdawite an pe a, Ciplox, eye drop Moxifloxacin, Prednisolone leh damdawi pawimawh dang eng emaw zat an pe tawh niin an sawi.

Damdawi-ina thawkte pawh an indaih lo hle a, volunteer eng emaw zatin an pui bawk.