Omar Abdullah nupui hlui hnawhchhuahna thupek dansak

Delhi High Court chuan Jammu and Kashmir Chief Minister hlui, Omar Abdullah nupui hlui, Payal Abdullah leh an fapate pahnih, Delhi Akbar Road-a an chenna bungalow chhuahsan tura thupek siam chu a dansak.

Payal Abdullah (53) hi Z caterogy security pek a ni a, an fapate pahnih Zahir (17) leh Zamin (18) te hi Z+ security pek tel an ni bawk. Payal hi June 30 khan an chenna hmun hi chhuahsan tura hriattir a ni.

Bungalow chhuahsan tura thupek an hmuh hnuah, Payal hi Delhi High Court-ah kalin, amah leh a fate vengtu sipai 100 bawr vel awmna tur hian New Delhi-a an apartment, 2,300 square feet-a zau chu a tawk dawn lo tih a sawi.

Justice Indermeet Kaur chuan hemi chungchang hi ngaihtuahin, Ministry of Urban Development leh Ministry of Home Affairs hnenah Payal-i ngenna hi chhang tur leh, an awm theihna tur hmun hmuhsak an nih hma chuan bungalow aṭanga chhuahtir lo tura sorkar laipui pawh hriattir turin a ti.

Payal-i chuan court hnenah a pasal nen awm hrang tawh mah se, an fapate himna chu ngaih pawimawh a ṭul tih a sawi. Mahse Additional Solicitor General Sanjay Jain chuan bungalow chu Omar Abdullah union minister a nih laia a awmna tura pek a ni a, a fapate chuan awmzui zel theihna chhan an nei lo, a ti thung. Omar hian a term a hman zawh hnuah, a chhungte hi bungalow-ah hian cheng zel thei an ni lo tiin a sawi.

Mahse Payal-i ukil chuan political hruaitu eng emaw zat, Priyanka Gandhi, Subramanian Swamy, Lt General KS Brar, Punjab police hotu hlui KPS Gill, Congress youth leader hlui MS Bitta, Buta Singh leh midangte pawh an nunna atana a hlauhthawnawm avangin sorkarin awmna tura a siam≠sakah venghimtu pekte nen an la awm chhunzawm a ni, a ti.