Karnataka CM-in Ravi thubuai CBI kuta hlan a remti

Eptu party-ten na taka an nawr hnuah, Kar­nataka Chief Minister S Siddaramaiah chuan IAS officer DK Ravi thih dan chungchang chu Central Bureau of Investigation (CBI) chhuitir a remti ta.

Thutlukna a siam thu hi chanchin thar lakhawm­tute hnenah hrilhin, CM chuan, 'Ravi thubuai hi CBI chhui tura pek turin ka ti tlu ta a ni' a ti.

IAS officer, Ravi hi March 16 khan Bengaluru-ah a chenna inah thi-a hmuh a ni a, state sorkar chuan CID a chhui tir a, mahse eptute chuan a thih danah hian thil dik lo a awm nia ngaiin CBI ngeiin chhui se an phut a ni.

CID report hmasa siamah chuan Ravi hi mahni intihlum nia tarlan a ni a, he report hi CM hian Assembly-ah pharh a tum a ni. Mahse Pathianni khan Karnataka High Court chuan CID interim report pharh tum hi a dansak.

CBI kutah thubuai hlan a nih tur thu a sawi rualin, CM Siddaramaiah chuan sorkar chuan eng thil mah thup emaw, mi hum tum emaw a nei lo tih a sawi. 'Sorkar chuan officer-ten dik taka hna an thawh theihna tura boruak ṭha pek a duh a ni. Kan police-te hi kan ring tawk a ni. CBI hi independent-a hna thawk an ni a, mahse CID pawh hi an ni ve tho a ni' a ti.