President leh Speaker-in Parliament-a kangmei chhuak an vei

Pathianni khan New Delhi-a Parliament com­plex pawn lamah kang­mei a chhuak a, kangṭhelh motor sawm hmang­a ṭhelh a ni a, thi leh hliam an awm lo.

Delhi Fire Service Di­rector AK Sharma chuan Parliament com­pound chhunga AC plant-a wel­ding ṭek aṭangin kangmei hi a lo chhuak niin a sawi.

President Pranab Mu­kher­jee chuan Parlia­ment House complex-a kangmei chhuak chu a ngaimawh hle tih sawiin, thuneitute chu rang taka thil awmdan enfiah tur leh, hetiang thil hi a thlen nawn tawh lohna tura a ṭul anga hma la nghal turin a hrilh.

Mukherjee chuan englai pawhin Parliament Complex himna leh security chu ngaihven a ngai a ni, a ti.

Lok Sabha Speaker Sumitra Mahajan pawhin Parliament House-a kangmei chhuak chu ngaihthah mai chi a ni lo tih sawiin, report kimchang pe turin a ti. Speaker chuan House chhunga wiring, fitting leh hmanrua-te chu a him tawk em tih enfiah vek turin thupek a siam nghal bawk.