Madhya Pradesh-a Biak-in suasamtute man an ni

Jabalpur, Madhya Pra­desh-a Catholic biak-in leh School suasamtu nia rinhlelh mi paruk te chu Thawhṭanni zing khawvar hma in Police-te'n an man.

Jabalpur Additional Superintendent of Police (ASP) Isha Pant chuan, "Catholic biak-in leh School suasamtu nia rinhlelh mi paruk te chu Thawhṭanni zing khan kan man tawh a ni," a ti.

An mi man te hi Hindu pawl pakhat Dharam Sena hruaitu Yogesh Agrawal, leh a thawhpui Nitin Rajak, Prateek Pyasi, Anurag Choukse, Abhishek Choukse leh Sharad Rao te an ni.

An mi man te hi tha­rum hmachhuana mi dang tibuai, vantlang hmun pawimawha buai­na chawkchhuaktu leh midang tih nat tum thu­buai awrh tir an ni.

Biak-in abuaina chawk­chhuaktu nia puh mi paruk te hian March 20 khan Jabalpur hmuna Catholic hmun te hi an bei a, nasa takin biak-in leh a chhehvel hi an suasam a, heng Catholic hmun leh hma enkawltu Father Thankachan Jose chu tihluihna a Hindu sakhua vuantute Kristian a let ṭhinah an puh.

Hetiang boruak hnuaiah hian Home Minister Rajnath Singh chuan tunhnaia Kristian biak-in te'n beih an tawk fo chu pawi a tih thu sawiin, hnam tlem zawk leh Kristian-te chu an him theihna turin BJP sorkar chuan a theihtawp a chhuah tur thu a sawi.