Kerala Assembly-ah in au buai leh

Kerala eptu pawl, CPI(M) kaihhruai LDF member-te chuan Finance Minister KM Mani duh lohna lantirin nimin khan Assembly-ah rorel inkhawm an tibuai leh a, inkhawm tihtawp lailawk a ngaih phah hial a ni.

Assembly inkhawm hi kar khat chhung chawlh lailawk a nih hnuin nimin khan chhunzawm leh a ni a, inkhawm ṭan a ni veleh eptu member-te chuan March 13-a Finance Minister-in budget a pharh ṭuma Speaker podium khawihtu, eptu MLA panga-te hremna chu sut an phut nghal a ni. Eptu member-te hian Finance Minister hi bar neitute hnen aṭanga thamna sum laa puh a nih avangin hetianga hmingchhiatna neiin budget a pharh an duh lo a, budget pharh ni hian house chhungah buaina an siam a, minister hi bang turin an phut.

Eptute an aubuai leh avangin Speaker chuan bill ngaihtuah tura tihte pawh a ṭhulh tir vek bakah, question hour pawh ṭhulh a ni bawk. Rorel theih a nih tak loh avangin inkhawm pawh tihtawp zui nghal a ni.

MLA suspend panga-te chu nimin khan Assembly Complex-ah hian an kal a, mahse Hall-ah lut loin main entrance-ah lungawi lohna lantirn an ṭhu a ni. Session tawp hnuah eptu member-te hian Assembly complex-ah nawrh an huaihawt chhunzawm bawk.

Kerala budget session hi March 9 khan ṭan a ni a, April 6 thleng a awh ang.